विचारांची भीमजयंती

ढोल ताशा नको तो डीजे नको जयंती नाचून

भिमजयंती करू साजरी विचार त्यांचे वाचून

माणसाला माणूस बनवलं भीमान

कायद्याला लेखणीत बांधलं भीमान

संविधान बाबाचे हे चालू या मान राखून

भिमजयंती करू साजरी विचार त्यांचे वाचून

महामारीने देशाला जगायला शिकवल

सत्ता पैसा अन् प्रतिष्ठा सार हो झुकवल

माणूसच देव झाला देवाला मागे टाकून

भिमजयंती करू साजरी विचार त्यांचे वाचून

हिरे नवरत्न पिकवली मराठी ही माती

एकसंघ देश व्हावा नको जाती पाती

सोडू सारे द्वेष मनातील देशभक्ती करु ठासून

भिमजयंती करू साजरी विचार त्यांचे वाचून

प्रलयाने पाहिली न धर्म आणि जात 

संकटात माणूस बनतो मदतीचा हात

जाणूनिया हित जनाचे तू सेवा कर मनातून

भिमजयंती करू साजरी विचार त्यांचे वाचून

शिक्षणात हित आहे जाणले भीमान

माणसात देव आहे मानले भीमान

विश्वरत्न शोभला हो करू मुजरा काळजातून

भिमजयंती करू साजरी विचार त्यांचे वाचून

घरी राहुनी करू साजरी विचार त्यांचे वाचून.