तिची नोकरी
तिची नोकरी
रोजचीच धावपळ
रोजचाच दिनक्रम
धाव धाव धावूनिया
किती करावेत श्रम!!
साहेबांचा दृष्टीकोन
पूर्ण आगळावेगळा
कशासाठी हवा स्त्रीला
नोकरीधंद्याचा लळा?
धावतपळत येती
असे रोजचा उशीर
लक्ष नसते कामात
सदा मनी भिरभिर
नित्यनव्या अडचणी
पुढे ह्यांच्या मांडलेल्या
येती रोज उशीराने
सबबीच ठरलेल्या
घरी दारी नोकरीला
नसे महत्त्व कधीच
नित्य रजेचा आग्रह
रजा घ्यावी तिनीच
सारी झेलते आव्हाने
घरी दारी कष्ट करी
नाही इतुकेच परि
स्वप्न पदोन्नती उरी
रस्ता खाचखळग्यांचा
परि करीन मी पार
बॉस बनून राहीन
मनी मनीषा ही थोर