सखे

खुणावते आहे गर्द वृक्षांची सावली

सखे बसू चल त्या आम्र तरू खाली

शीळ घालितो वारा

मोर फुलवी पिसारा

मंद वाहतो हा झरा

वसंतास आज कशी बघ लाली आली

सखे बसू चल त्या आम्र तरू खाली

पक्षी किलबिल करती

भ्रमर फुलांचा सोबती

जणू गातसे आरती

ही गोजिरी हरिणे फिरती भवताली

सखे बसू चल त्या आम्र तरू खाली

नदीकाठी हिरवळ

किती शीतल जळ

सुमनांचा परिमळ

तुझ्या देहाचा सुगंध पोहोचला आभाळी

रवि माघारी फिरला

रंग नभात विरला

बघ दिवस सरला

गल्लीगल्लीत पेटल्या दिवा नि मशाली

सखे चल अपुल्या परतुनी महाली