परीक्षेत नापास होणारी मुले
परीक्षेत नापास होणारी मुले
परीक्षेत नापास होणारी मुले
नसतातच या ग्रहावरची
ती नाही जुमानत तुमच्या भिकार परीक्षा पद्धतीला
त्यांना नाही फरक पडत तुमच्या
दीडकीच्या हिशोबात तोलल्या जाणाऱ्या मार्कांनी
अठ्ठ्याण्णव टक्के मिळूनही
अर्धा टक्का कुठे हरवला याचा शोध घेत
ती नाही गहाण ठेवत आयुष्यभराचा आनंद
जे जीवनाशी एकरूप होत नाही
त्याला नाही म्हणत ती शिक्षण
त्यांना पक्की ग्यारंटी असते
आपण नक्की फेल होणार
बापाचा राग आणि आईचे अश्रू
नाही वळवू शकत त्याचं मन
त्यांच्यापुढे नसतात कुठलीही स्वप्ने
अाणि नसते स्वप्न तुटण्याची भीती
त्यांना माहीत असतात आपल्या मर्यादा
आणि माहीत असतं आपलं सामर्थ्य
ती मुळातच असतात समजदार
आणि कणखरही
म्हणून ती नाही करत आत्महत्या
नापास होण्याच्या भीतीने