शेतकरी

रात्रंदिवस करी काळ्याआईची सेवा

नाही करी कधी कोणाचा हेवादावा

हातावर घेऊन भाकरी ठेचा कांदा खाई

आहे त्या परिस्थितीत समाधानी लई

जरी नसली स्वतःला अजिबात शेती 

तरी दुसऱ्या कडे सालधरुन राबती

औतकाठी नांगर बैलांची सावड करी

दुसऱ्यांच्या मदतीला धावे लवकरी

पेरणीच्यावेळेला संशय येई मनात

भेसळ तर नसेल ना या बियाणांत

खतंपाणी व खुरपणीला कष्ट फार

पिकं डोलते काळयाराणी चिकार

बरेचदा आडाणी राहून मुलांना शिकवती

न राबावे मुलांनी या करिता धडपडती

पक्षिअनं गुरं राखणीला माणसांची कमी

मग माणसां परी उभे बुजगावणे डमी

खळं केल्यावर डोक्यात विचार नुस्ता

किती ठेवू घरी किती भरू कर्ज हप्ता

धनधान्य मोंढयावरती विकायला नेती

व्यापारी आडते शेतकऱ्यांना खुप पिळती

राजकारणात योजनांचा भडिमार होतो

लाभ मात्र चाळणीतून पदरी पडतो

निवडणूकी वेळी जाहीरनाम्यात अग्रस्थान

 प्रश्न सोडण्या सत्ताधारी विरोधकात ओढातान

बळीराजा जगाचा पोशिंदा गोष्ट आहे खरी

पण कर्जबाजारीपणाने गळ्यास लावी दोरी