रुद्र मंथन

अलगद उतरला सोनकवडसा श्रावण धारा मेघातून

नाचू लागले मोर केतकी रंग मोहरले रेशमातून

शिरशिर शिरशिर शिरला वारा रूपेरी त्या पंखातून

उबदार ही शीळ घालीत राघु फिरला रानातून

घडघड घडघड झाड हलले हलला पक्षी देठातून

थरथरथर अंग मोहरले उसवले हिरव्या पानातून

झरझर झरझर रुद्रमंथन ते तलम सोनशलाकांतून

सा रे ग म सरगम उठती वृंदावनी त्या वेणूतून

बहरे रंग रंगीत बहार हा सृजनाच्या कर्णकोशातून

कोशातून तृप्त झाले निसटले मोती चोचीतून

हरहर हर्दिनी अमृतवाणी स्त्रवते पाणी झऱ्यातून

तड़तड़तड़ शब्द पाझरे सरस्वतीच्या वीणेतून