रंग गुलाबी केशरी...

दिवस अन् रात्रीच्या काठावर ,

सांज सागरात उतरत होती ,

तुझी सोबत हवी तिला ,

ती रोज मला खुणावत होती...

मऊशार रेताळ वाटेला,

नदी रोज ओलावत होती,

सागराची साथ तिला ,

उधाणलेली लाट होती...

रंग गुलाबी केशरी जांभळा,

लाजुन सांज गेली होती,

क्षितीजाच्या प्रेमात ,

सांज हरवुन गेली होती...

सहावेना हा दुरावा ,

सोबतीच्या क्षणांची विनंती होती,

ही रात्र रेशमी बंधानी ,

सप्तपदीने अलवार गुंफली होती...