रात्र पानावर झिरपत होती...

रात्र पानावर झिरपत होती,

उदास पानांना कुरवाळत,

वाऱ्यावर झुलवत होती...

रात्र काळी काहीशी,

काळवंडत होती ,

हिरवळ पानाची,

अस्तित्व विसरली होती...

वेडी रात्र बहरून,

चांदणे फुलवत होती,

सांडता पानावर चांदणे,

पाने सुखावत होती...

ओसरत चालली रात्र,

हात सोडत होती ,

पाने शहारतांना पाहून,

हळूच हसत होती ...

हळदीने माखलेली पाने,

रात्र विसरली होती ,

धरून हात पहाटेचा,

खळखळून हसली होती...

रात्र पानावर झीरपत होती,

उदास पानांना कुरवाळत,

वाऱ्यावर झुलवत होती...