रांगोळी
रांगोळी
बाई पहाटेच्या वेळी दारी रांगोळी काढते
कुंकू हळद चिमुट रंग सुखाचे भरते
बाई टिपके टिपके एका ओळीत मांडिते
जणू माणसे माणसे नाती जोडित रहाते
बाई रेष रांगोळीची सदा रेखीव काढते
जणु आयुष्याचे मर्म एका ओळीत सांगते
बाई स्वस्तिक रेखिते बाई शंखही रेखिते
ईडा पीडा दुःख सारे दाराबाहेर ठेविते
रांगोळीच्या रेषा वक्र गोलाकारही काढते
बाई संसाराचा तोल प्राणपणाने जपते