नातं तुझं माझं

तुझ्या माझ्या नात्यात 

काही टिकाऊ आहे 

की सारंच टाकाऊ झालंय

या संभ्रमात

अनेकदा कागदावर रेखाटलेलंही

पुसून टाकते मी कित्येकदा

मनाचं कॅनव्हास कोरं करून

नात्यांची उकल व्हावी 

याकरता

उगीचच रेघोट्या मारत रहाते

सुटण्याऐवजी

गुंता वाढत चाललाय

मी जितकी चिंब भिजत चाललेय

तितकाच तू कोरडा होत चालला आहेस

असं मला वाटणं

हे खरं

की, हा माझा भ्रम?

हा संभ्रम

दूर करावासा वाटलाच तर

उरलेल्या श्वासांचं ओझं 

होण्याआधीच

एकवार हाक दे

सखी म्हणून