पाऊस

आकाश आले भरूनी 

काळे मेघही दाटले

आकाश नभी पाहतो

मन आनंदी जाहले.. १

मेघ करती आवाज

जणू भांडती नभात

मेघ सजला अंबरी

गाभारा सजला आत.. २

शामल ढग गगनी

काळोख दाटे घरात

शामल एकटी घरी

भिती दाटली मनात .. ३

नाद आला धरेवरी 

चराचरात घुमला

नाद लागला सार्‍यांना

जो तो मनी भाळलेला .. ४

पिसे पसरून पक्षी

घरट्यात विसावले

पिसे लागले त्यांनाही

मजेने नभी उडाले .. ५

गंध आला मातीचाच 

 पहिल्याच पावसाने

गंध लावीला धरेला

 जणू त्या थेंबाथेंबाने .. ६

 

सर आली जोराचीच 

सारी धरा चिंब ओली

सर घातले पानांना

माळेने सजे अबोली ... ७

तीर भरला पाण्याने

गंगा वाहते जोशात

तीर मारला ढगांना

शेत वाढले तोर्‍यात ... ८

आकाश ... नभ , मुलाचे नाव

मेघ ... ढग , घुमट

शामल ... सावळा , मुलीचे नाव

नाद ... आवाज , छंद

पिसे .... पंख , वेड भरणे

गंध ... वास , टीळा

सर ... पावसाची , माळ

तीर... नदीकाठ , बाण