नकोस इतका...

नकोस इतका छळू पावसा

नको तिथे कोसळू पावसा

घर माझे पाझरते आहे

अश्रू लागले गळू पावसा

सवय बरी ना झोडपण्याची

बरस जरासा हळू पावसा

नको ढगाच्या जात्यामधुनी

दुःख तुझे तू दळू पावसा

खेळात तुझ्या थकून गेले

सांग किती मी पळू पावसा?

नको असा तू भलत्यावेळी

डोळ्यांतून ओघळू पावसा

रागामध्ये नको ढगाचे

दार असे आदळू पावसा

लागली आहे मलाच माझी

चूक आता रे कळू पावसा

बस झाला धिंगाणा येथे

गरज तिथे चल वळू पावसा