बालपणीची शाळा

मला वाटते आज शाळा हवीशी

मला वाटते बघ शिकावे पुन्हा

जुने दिवस सारे पुन्हा आज यावे

जुने मित्र सारे दिसावे पुन्हा

सकाळी सकाळी तयारी करावी

अशी धाव घ्यावीच शाळेकडे

लिहावे पढावे किती बागडावे

जणू फूल व्हावेच बागेतले

धडा जीवनाचा गिरवला इथे मी

अहोभाग्य ऐसे गुरु लाभले

कधी चूक होता छडी मारलेली

कधी जवळ घेवून समजावले

असे सोबती काल साथीस होते

पहा घास देतात घासातला

मला आठवे आज सारे नव्याने

कसा कोण जाणे गळा दाटला

किती काय शिकलो कसे आज सांगू

दिले पाठ होते यशाचे मला

मिळे आज आकार या जीवनाला

जरी ज्ञान नव्हते कशाचे मला

लिहू काय त्यावर किती आज मीही

कधी प्रेम शब्दात का मावले

मला ज्ञान देती गुरू मित्र माझे

तयांची सदा वंदिते पावले