तुझी आठवण

फार बेभान झाली तुझी आठवण

चिंब अश्रूत न्हाली तुझी आठवण

रात्र सारीच स्वप्नात गेली तुझ्या

जाग येताच आली तुझी आठवण

गाठते ती कधीही कुठेही मला

हासते गोड गाली तुझी आठवण

थांग लागू तुझा देत नाहीस तू

मात्र देते खुशाली तुझी आठवण

भास होतो तुझा सारखा सारखा

सारखी साद घाली तुझी आठवण

सोडले तू जरी सोडते ती कुठे

राहते भोवताली तुझी आठवण

जा म्हणावे तरी जात नाहीच ती

फार जिद्दी निघाली तुझी आठवण