जळते दिव्यातली ती....

जळते दिव्यातली ती होवून वात आई

अन दाटल्या तमावर करतेच मात आई

मज ठेच लागली की व्याकूळ तीच होते

पाहून दुःख माझे दाटे उरात आई

पिल्लास वेदना या होता उदास होते

जेव्हा सुखात आम्ही तेव्हा सुखात आई

झाले अमीर मीही उरली न हाव कसली

लाजे कुबेर मजला आहे घरात आई

येते कुठून हे बळ अंगी तुझ्या कळेना

तू पार संकटांना करते क्षणात आई

ती आसपास माझ्या एकेक श्वास माझा

देहात तीच आहे, आहे मनात आई

का पोरके कुणाला करतोस ईश्वरा तू

सर्वास तू दिसू दे कायम जगात आई

ना मंदिरात कुठल्या,ना देवळात आहे

आईत देव आहे देवा तुझ्यात आई