नारळी पौर्णिमा

सण राखी पौर्णिमेचा

भावा ओवाळी बहिण

असे ओलावा मायेचा

सुख नयनी वाहिन ।।

आज नारळी पौर्णिमा

सण भाऊ बहिणीचा

बंधूराया ओवाळीते

क्षण अती आनंदाचा ।।

पाठीराखा भाऊ माझा

त्याची वेडी असे माया

किती पडलं संकट

धरी माझ्यावर छाया ।।

मागे बहिण भावाला

ठेव माय बापा सुखी

नको मला साडी चोळी

घाल घास त्यांच्या मुखी ।।

माय बापाहूनी मोठं

नाही जगामध्ये कोणी

होई त्यांचा पाठीराखा

हीच मला ओवाळणी ।।

सण नारळी पौर्णिमा

मोठा मच्छीमारांसाठी

कोळी नारळ वाहून

भरी सागराची ओटी ।।