नाळ तुझी माझी

नाळ तुझी मला , असे जोडलेली

चाहूल येताच , मी सुखावलेली(1)

हालचाल तुझी , जाणवे मजला

हळूच रे बाळा , कसे सांगू तुला?(2)

गप्पा किती मारी , मी तुजसंगती

हुंकार देऊनी , औत्सुक्ये ऐकसी (3)

पौष्टिक पदार्थ , नाळेने दिधले

गाठ तुझी माझी , नातेच सांधले(4)

जन्म दिला तुज , वाढविले प्रेमे

नाळेचे बंधन , घट्ट गोफ झाले (5)

शिक्षण होताच , कर्तृत्व बहरा

कृतज्ञ नाळेला , चेहरा मोहरा (6)

क्षितीजे विस्तारी , पंख पसरुनी

मागे न पहासी , मान वळवूनी (7)

हळूहळू सारे , इथले धूसर

वेळ नसे तुज , सदा कार्यभार (8)

मोठा होता होता , लांबच गेलासी

पैलतीर मज , जवळ आलासी (9)

नाळेचे बंधन, आता वाटे तुटे

सुखी असो बाळ , माय मुखावाटे  (10)