मन

उंचच उंच उदात्त आभाळासारखं

की भ्रष्ट आणि उथळ समुद्रासारखं

मनाचं लेणं जितकं कोरावं

तितकं ते गूढ सजीव अवघड

आतल्या आत समृद्ध चमत्कारी

प्रसंगी उत्त्कट उद्ध्वस्त अविचारी

डोंगर दरीच्या मूक झऱ्यासारखं

वेळ काळाशी जुंपलेल्या क्षणभंगुर वळीवाचं

भग्न राऊळाच्या जयघोषातलं

निश्चयी पोकळ खडकासारखं

बेदरकार वाऱ्याच्या आवेगात

विचारांच्या तुफानानं कणाकणात विखुरणार

भावनांच्या गोदामात काथ्याकूट करणार

अविवेकी नात्यांचे कासरे हाकणारं

स्वार्थाच्या शेकोटीची ऊब घेत घेत

जीवनाच्या चालीने अनुभवांची महाकाव्य रचणारं....