मी तर रणरागिणी

काव्यप्रकार  अष्टाक्षरी

चिमुरडी जरी बेबी

तरी मोठी होईनच

स्वप्न साकार बाबांचे

भविष्यात करीनच     (1)

सीमेवर लढताना

का हो धारातीर्थी तुम्ही?

गणवेश सैनिकांचा

घालतसे हौसेने मी    (2)

बेटी माझी लई गुणी

भूदलात अधिकारी 

गाजवेल रणांगण

स्वप्नं बाळगली उरी    (3)

खूप खूप शिकूनिया

अधिकारी मी होईन

गणवेश घालूनिया

रणांगण गाजवेन     (4)

पराक्रमी वडिलांची

लेक मी रणरागिणी

नाव तुमचे उज्ज्वल

कर्तृत्वाने रणांगणी    (5)

स्वप्न पित्याचे साकार

लेक करेल निश्चित

पराक्रमी लेक सांगे

बाबा राहा हो निश्चिंत    (6)