माय

धन्य ती माय माझी

असलेली कृपेची सावली

मातेची महती वेगळी

आई अतरंगी सामावली.../१/

काय तिचा महिमा वर्णू

अखंड झिजली लेकरासाठी

दीपक तळहाती घेऊन

तेल टाकताना गाठलीस साठी.../२/

तुझेच संस्कार सदा मिळे

शिकवून तू एकेक धडा

आई तुझ्याच आशीर्वादाने

गिरविते मी संस्कार पाढा…./३/

अन्याय सहन केलास

झेलूनी वार दुष्टांचे

अविरत प्रयत्न सुरू ठेवले

प्रमाण दिलेस आपल्या कष्टाचे.../४/

आई तू ममतेची खाण

वात्सल्य मूर्ती तुझेच नाव

आईविना भिकारी म्हणे

स्वामी तिन्ही जगाचा ठाव../५/

आई तुझे उपकार किती

नाहीच फेडता येत ग

फेडण्याची भाषा करता

नाहीच मी मोठी झाली ग.../६/