भेट तुझी माझी

भेट ती तुझी माझी स्मरते

त्याच गंधाळलेल्या रात्रीची

स्वप्नवत वाटे मला राजा

भेट ती अंबर - धारित्रीची //१//

घेऊनी प्रेमाची ती शपथ

विणून जाळे या हृदयात

बंदिस्त केली तीच प्रतिमा

ओलावलेल्या या नयनात //२//

अश्रूंचा थेंब तो सांडताना

अलगद टिपून त्या ओठी

भावनांचा  मेळ  घडतांना

गुंतून गेल्या गाठीत गाठी //३//

सूटता सुटेना आठवणी

उकलून कोडे जीवनाची

मांडतांना आज एक एक

कवाडे उघडे ती मनाची //४//

डोकावणाऱ्या धुंद क्षणांना

घट्ट मिठीत मी आवरले

सोडून मोकळा श्वास तोच

उन्मत्त झाकानी सावरले //५//

एकदा भेट सख्या तू मला

करुनी मोकळे तन मन

अव्हेरू नकोस आज मला

स्मरूनी तोच गंधीत क्षण //६//