माय

भूक-तहान सोसून

माय शेतात राबते ;

सर्जा- राजाच्या संगतीने

शेत मशागत करते.

                अर्ध्यावर डाव मांडुनी

                 बाप तिला सोडून गेला ;

                 साऱ्या कर्जाचा बोजा मग

                  मायच्या डोईवरी आला.

पिकविमा मिळण्या माय

बँकेचे उंबरठे झिजवते ;

शेतमाल विकाया बाजारी

उन्हांत अनवाणी हिंडते.

                      निसर्गाच्या दुष्टचक्रात माय

                      आमचं भविष्य शोधते ;

                      कष्ट , हाल-अपेष्टा सोसून

                      भार कुटुंबाचा पेलते.

वीतभर पोटासाठी माय

भाकरीचा चंद्र शोधते ;

तिचं त्याग- समर्पण

साऱ्या जगाला दिसते.