Library
Profile
माय मराठी माझी
माय मराठी माझी
मधुर लाघवी रसाळ सोपी माय मराठी माझी
सुगम सरल अन् आशयघन ही माय मराठी माझी
सालंकृत ही शृंगाराने अलौकिक हिची रत्ने
अनमोल हिच्या रूप गुणांची किती रचू मी कवने
विशाल अनुपम ग्रंथ संपदा हिची वाढवी शोभा
उत्तुंग अशा त्या हिमालयाहुन भव्य हिचा हो गाभा
ज्ञानेशाने वीट रोवली ग्रंथ निर्मिला पहिला
थोर कवी अन् लेखक यांनी जतन वारसा केला
कुसुमाग्रज बी अन् पु. ल. गदिमा संपत नाही नावे
प्राशन करुनी ज्ञानामृत ते धन्य होऊनि जावे
>
सुनीत कविता गझल लावणी हिचीच सारी अंगे
ललित कथा अन् विनोद नाटक रंगू यांच्या संगे
भारुड गौळण भजन कीर्तने, अभंग आणिक ओवी
गोंधळ आर्या पोवाड्याची किती थोरवी गावी
वेगवेगळ्या प्रांतांमधल्या नानाविध बहु बोली
कधी गोड तर कधी रांगडी हिची अनोखी शैली
बेळगाव अन् कोकणातली मधाळ बोली न्यारी
मराठवाडा कोल्हापुरचा ठसका असतो भारी
समृद्ध अशा भाषेचे या पाइक होऊ सारे
मनामनाच्या अंगणातही तिचेच वाहो वारे
