माझा भारत देश महान

माझ्या देशा भारत देशा

तुझा आम्हा अभिमान

लहरत राहो उंच तिरंगा

त्याची वाढत राहो शान

देश आमचा शेतकऱ्यांचा

सारे म्हणती कृषीप्रधान

सुखात राहो बळीराजा

त्याचा वाढवू आत्मसन्मान

सैनिक लढती सीमेवरती

तळहाती घेऊनी प्राण

देशरक्षणासाठी करती

ते सदा जिवाचे रान

स्वातंत्र्याच्या यज्ञासाठी

ज्यांनी अर्पिले आपुले प्राण

नित्य स्मरावे आपण त्यांना

देशाचे तेच आण बाण शान

 सुखसमृद्धी इथे नांदावी

ठेवावे याचे आपण भान

मुखी असावा एकच नारा

माझा भारत देश महान