जय गजानन

हे गजानन, गौरी नंदना, पुरवा मम कामना |

सत्य, शिव, अन सौंदर्याची व्हावी आराधना ||

पावित्र्याची, चैतन्याची, तू मंगलमूर्ती |

दुःख निवारुनी , सुख द्यावया, येशी या जगती ||

चिंतामणी तू, तुझ्या चिंतने, विघ्ने दूर हरती |

तुझ्या कृपेने लाभे मजला, रचनेची स्फूर्ती ||

सकल गुणांचा गुणाधीश तू , कलांचा अधिपती |

वेदविद्या, सकल शास्त्रही तुज पुढती नमिती ||

काव्यारंभी कृतज्ञतेने, करिते तुज वंदना |

शांती, समता, बंधुत्वाची, लाभावी मज प्रेरणा ||

रिद्धीसिद्धीच्या वरा, दयाळा, ओवाळून आरती |

प्रार्थितसे तुजला मी गणेशा, करी सकल कामनापूर्ती॥