जग सारे आहे स्वार्थाचे...

असंगाशी संग आणि प्राणाशी गाठ

असे नियतीचे लेणे घ्यावे ते जाणून

न जावे शरण कुणा उगाच कधी 

टाकावे पाउल त्याचे साधर्म्य ओळखून... 

असावी संगत सज्जनांची 

सावलीतही दुर्जनांच्या उभे न राहावे 

घ्यावे जाणून मर्म वागण्याचे 

उगाच कुणाच्या तोषीस न लागावे...

जग सारे आहे स्वार्थाचे

भेटतात लबाड लांडगे पावलोपावली 

न भुरळावे थापास त्यांच्या

करतात घात देऊन शालीनतेची सावली...

साधेपणाचे जरी असले वागणे

जगणे आपले कधी दुर्जनांपरि नसावे

द्यावा आधार इथल्या दीन दुबळ्यांना

ते नसतील आपले पण आपण त्यांचे व्हावे...