शब्दांचे माझ्या शुभ्र मोती झाले
शब्दांचे माझ्या शुभ्र मोती झाले
कित्येकदा तरी सावरली
डायरीतील निखळलेली पाने
होते ज्यावर लिहिलेले
माझ्या जीवनाचे तरल तराने
जोडण्याचेही झाले माझ्याने
तरीही कित्येकदा ते विस्कटले
धरून ठेवले हाती घट्ट
तरीही हातून बर्याचदा निसटले
कप्प्यात मनाच्या बंदिस्त
पण अस्ताव्यस्त सारेच विखुरलेले
जमवण्याचा प्रयत्न नेहमीचाच
पण पसरणे त्यांचे सारखेच ठरलेले
कित्येक आठवांचे उमाळे
त्यात लेखणीने माझ्या लिहिलेले
सुख दुःखाचे रंगतरंग
लाल निळ्या शाईत त्यावर उमटलेले
अजुनही एकवटत आहे मी
माझ्या डायरीतील निखळलेली पाने
पाहिले होते मी स्वप्नात जे
तेच होते त्यावर माझ्या जीवनाचे तराने
पानावरील त्या डायरीच्या
शब्दांचे माझ्या शुभ्र मोती झाले
सावरता सावरता थोडेसे
अश्रू बनून नकळत ते ओघळले