जाऊदे ना बाहेर.....
जाऊदे ना बाहेर.....
आई बघ ना थांबला वारा ,
येतील गं आता टपटप धारा ...॥ध्रु ॥
आई, जाऊ देना बाहेर जरा,
उरकला अभ्यासही सारा .
सुटलाय बघ गोडगोड वारा ,
अंऽऽ आई चल जाऊ बाहेरा .....॥ १ ॥
करू गं पटपट कागदी नाव ,
अलगद सोडेन ती पाण्यावर.
हात धरून घेऊ पावसात धाव,
झालंच तर वेचू मिळून गारा .......॥ २ ॥
आई आई सुरू झाला गं पाऊस ,
पोरही बघ घालताहेत धुडगूस .
नको आता तरी मला थांबवूस ,
आवरू आल्यावर सारा पसारा....॥ ३ ॥
हळूच घेतली आई गालाची पप्पी ,
आई आई म्हणत गच्च मारली मिठी ,
विरघळत ती जा म्हणताच दिली झप्पी ,
धडक मीही केला लगेच पोबारा...॥ ४ ॥
पाऊस धारात भिज भिजलो ,
मनमुराद पाण्यात नाचनाचलो.
इकडून तिकडून पळत सुटलो ,
मनच होईना जाण्या घरा माघारा....॥ ५ ॥