लेक आली माहेरासी

       लगबग पहा उडे ,

       लेक येणार माहेरी .

       डोळे लावी वाटेकडे ,

       भाऊही बहिणी परि ..॥ १ ॥ 

       टपाल हाती पडता, 

       आले उधाण आनंदा .

       बहू दिसा लेक येता ,

       नाचे घरदार मोदा ..॥ २ ॥

      घोंगडीचे अच्छादने, 

      सजला बैल छकडा .

      बहिणीस घेण्या सवे ,

      निघाला भाऊ भाबडा..॥ ३ ॥

      

      वाट पाहे भाऊराय, 

      उभा हम रस्यावर .

      लालपरीनेच त्याची

      ताई लाडकी येणार ..॥ ४ ॥

      लेक येता माहेरासी ,

      भासे दिवाळी दसरा .

      संतोष आई बाबासी ,

      सुखी पाहता पाखरा...॥ ५ ॥

      राहिल्या आठवणीच ,

      पाणावती डोळे आता .

      भासे स्वप्नवत सारे ,

      दुस्तर माहेर,भ्राता..॥ ६ ॥

      नाती झाली स्वार्थी सारी ,

      प्रेम,स्नेह नावासाठी. 

      भाव खोटा अहंकारी ,

      माहेरपण स्वप्नगोष्टी..॥ ७ ॥