जातीयता
जातीयता
प्रत्येकाच्या माथी-कपाळी
जाती-पातीचा शिक्का;
जातीयतेची ही मालिका
म्हणजे धक्क्यावर धक्का.
शाळा प्रवेश दाखल्यावरच
जात-पोटजातीचा कॉलम;
जातीयतेची जखम भरण्याकरिता
आणणार कोठून मलम?
काढली तरी जात नाही
"जात"एवढी हट्टी;
माणसा माणसातील उंची
मोजायला जातीचीच मोजपट्टी.
जातीला जातीतला भेटता
काहीही करायला राजी;
जात निकषात आकाशासम
माणसेही होतात खुजी.
जातीयतेचे 'कास्टिंग' करून
जातविक्रीचा जणू धंदा;
भारताच्या विकासात जातीयता
म्हणजे फाशी का फंदा.
जातीयतेवरून ओबामांच्या
भारताला कानपिचक्या;
'समान नागरी कायद्याच्या'
उच्चाराने सत्ताधाऱ्यांना उचक्या.
भल्या भल्यांची जातीय
रंगरांगोटीपूढे अक्कल गहाण;
जातीभेद निर्मूलनाची
कधी शमेल हो तहान?