इवली
इवली
इवलिशी चिमुकली सर्वांची ती आवडती ,
सुंदर नितळ चेहरा जणू साईचं साजूक तूप ,
आई- बापाविनाची पोर होती सर्वांच्या जीवाभावाची ,
आजीआजोबा होते तिचा भक्कम आधार ,
पायातल्या सुंदर पैंजणाचा छम छम करत आवाज,
जाई रोज मंदिरात आजोबांबरोबर दर्शनाला ,
कळत नकळत झाली सर्वांच्या आकर्षणाचा विषय ,
खूप गोड दिसत असे ती इवली परकर - पोलक्यात !
चमकदार लुकलुकणारे डोळे आणि काळ्या कुरळ्या
केसांचा जणू वाटे सर्वांनाच हेवा !
चपळ , चंचल व हुशार , सर्वांना हवीहवीशी वाटणारी,
होती जणू अवतरली एक परी होवून ती जमिनीवरी ,
हसरा निरागस चेहरा आणि नाजूक देहयष्टी ,
इथून - तिथे बागडताना दिसे जणू ताजं टवटवीत फूल , .
बघता बघता इवली आता झाली थोडी मोठी ,
जाऊ लागली नर्सरी , केजीत ,आजीचा हात धरून ,
वर्षामागुन वर्ष सरली , इवली शाळा- कॉलेज शिकली ,
तल्लख बुद्धीची व खूप अभ्यासू होती ती म्हणूनच तर डॉक्टर बनली !
आणि सर्वांच्या कौतुकाचा , प्रेमाचा विषय झाली .
आजी- आजोबांची तपस्या सार्थक झाली !
"आजी मी लग्न नाही करणार " म्हणता म्हणता ,
एका देखण्या तरुण डॉक्टरच्या प्रेमापुढे हरली ,
आणि एके दिवशी तिच्या लग्नाची घडी आली ,
खूप सुंदर तेजस्वी दिसत होती ती वधूच्या वेशात ,
वर सुद्धा दिसला दिमाखदार राजबिंडा राजकुमार ,
थकलेल्या आजी- आजोबांनी नातीला दिला निरोप,
दुःखी पाणावलेल्या डोळ्यांनी पण समाधानी मनाने ,
सर्वांची आवडती इवली झाली इवल्याश्या बाळाची आई ,
थाटून संसार स्वतःचा , केला सांभाळ आजी - आजोबांचा ,
अशी होती ती इवली , सर्वांसाठी प्रेरणादायी !!