गुंततो जीव सखे..

मिटुनी लोचने तू ये माझ्या मिठीत ।

अशी राहू दे मजला तुझ्या कुशीत ।। धृ।।

गंधाळली गर्द निशा धुंद या आसमंती ।

मदन समीर मंद वाहे रातराणी सोबती ।।१।।

उठे तप्त रोमांच यामिनी माझे या तनूत ।

बहर तू अलवार जसा साद मंजुळ वेणूत ।।२।।

गुंततो जीव सखे रेशमी मोकळ्या केसात ।

मखमली स्पर्श सुगंधी भिडे हा काळजात ।।३।।

थरथर ही मम हृदयात ठेव तुझा असा हात ।

फुलू दे मधुर मिलन आहे तरुण ही रात।।४।।

शांत होई मन साजणी तव मलमली अधरात ।

विसावा मिळे क्षणोक्षणी इथे चिर निवांत ।।५।।

बांधूनी पाश घे हळूवार मला तुझे कवेत ।

होऊ दे बिलगुनी प्रेम पहाट मस्त या नशेत ।।६।।