दिवाळी

दिवा तेवतो अंगणी l

लख्ख झळाळी झळाळी ll   

उजळल्या चहुदिशा l

सण आला हा दिवाळी llधृll

         सण हर्ष आनंदाचा l

       उत्सवं हा उल्हासाचा ll

        आपुलकी जपण्याचा l

       नात्यातल्या गोडव्याचा ll1ll

लाडू,चकली,चिवडा l

गोड फराळ फराळं ll     

गंध सुवास सुवास l

सारीकडे दरवळं ll2ll

          पीक डोलते शेतात l   

         धरणीही सुखावली ll

         हास्य बळीराजा मुखी l

         सण आनंदी दिवाळी ll3ll

वस्त्र रंगीत रंगीत l

हर्ष ख़ुशी पसरली ll   

पाच दिसाच्या सणानं l

कळी सौख्याची खुलली ll4ll

           वसुबारसेचा दिन l

           गाय वासरास मान ll

           छान आरोग्य वर्धना l

           धन्वंतरीचं चिंतन ll5ll

देवता धनाची लक्ष्मी l

तिला करूया नमन ll   

इडा पीडा टळो सारी l

म्हणून लक्ष्मी पुजन ll6ll

           आला दिवाळी पाडवा l

           छान रांगोळी अंगणी ll

          भावा ओवाळी बहीण l

        भाऊबीजेच्या या दिनी ll7ll

आला हर्ष उधळत l

सण सौख्याचा दिवाळी ll  

देई मांगल्य प्रतीक l

फेडी अंधाराची जाळी ll8ll