गंध दरवळे माती

गंध दरवळे माती l

थेंब पावसाचे आले ll

धन्य झाली धरामाय l

मन तिचे आनंदले llधृll

      मेघ काळेकाळे भोर l

      कसे खेळती पळती ll

      वारा वावधन वाहे l

      त्यात विजेची भरती ll1ll

ढोल आभाळात वाजे l

वाजे वाऱ्याची पिपाणी ll

वरात आली पावसाची l

बघा नटली अवणी ll2ll

         चैत्र वैशाखाचं ऊन l

        धरा तप्त तहानली ll

        थेंब वळिवाचे येता l

        कशी सुखावुनं गेली ll3ll

सर बरसे जोमानं l

नाचे रानामंधी मोर ll

पिकं भिजलं शेतात l

जिवा बळीराजा घोर ll4ll

          गारा पडल्या टपोऱ्या l

         मना मोहून त्या गेल्या ll

         लग्नात धरा पावसाच्या l

        कुणी अक्षदा फेकल्या ll5ll

उन्ह कोवळं दाटता l

मेळ सप्तरंगी झाला ll

सोहळा सृष्टीचा पाहण्या l

रथ देवाजीचा आला ll6ll

        तरुवेली स्तब्ध सारी l

       पक्षी पावसात न्हाली ll

       खण हिरवा लेवून l

      आज धरीत्री हसली ll7ll