*अन्नदाता*

काळ्या ढेकळात राजा l

स्वप्न हिरवं पेरतो ll

बाप शेतकरी माझा l

रातं दिवस राबतो *llधृll*

          किती कष्टतो झिजतो l

         घाम शेतात गाळतो ll

        घासासाठी रं साऱ्यांच्या l

        बाप स्वतःला पिळतो *ll1ll*

रोज उपाशी तापाशी l

जितेपणी चं मरतो ll

रक्त आटवुनी बाप l

शेत शिवारी झुरतो *ll2ll*

         नाही तमा संकटांची l

         औत नांगर धरतो ll

        धुरा जगाच्या पोटाची l

        बाप लिलया पेलतो *ll3ll*

उन्हातान्हामंधी काम l

रोज पोळतो पोळतो ll

काळ तरीबी नुसता l

माझ्या बापाला छळतो *ll4ll*

           कर्ज काढुनिया बाप l

          माळरान फुलवितो ll

          तरी कष्टाला रं त्याच्या l

          भाव कवडीचा येतो *ll5ll*

अवकाळी नी दुष्काळी l

रोज रोजच पिडतो ll

नाही होत हतबल l

योद्धा होऊन लढतो *ll6ll*

        स्थान कुटुंबापेक्षाही l

       आधी जगाला तो देतो ll

       देश म्हणून बापाला l

       अन्नदाता म्हणवतो *ll7ll*