भाकरीचं झाड

माझ्या बापाच्या शेतात l

झाडं भाकरीच आलं ll

पिकं मातीवरीं उभं l

कस वाऱ्याने डोललं *llधृll*

      चाले तिफनीचा फाळ l

     करा पेरणी पेरणी ll

     बीज दडे भुईआड l

    त्याची निराळी कहाणी *ll1ll*

बाप राबतो राबतो l

औत धरीतो शेतात ll

त्याच्या घामावं तरल l

पिकं हिरवं रानात *ll2ll*

        बाप माझा अणवाणी l

       करी रक्ताचं पाणी ll

       सारं शिवार हिरवं l

       झाली झाली आबादाणी *ll3ll*

रात रात जागुनीया l

पाणी भरीतो शेताले ll

लेकरांवाणी जपतो l

बाप माझा पिकांले *ll4ll*

        उन्हतान्ह बारा मास l

        राबतोय रातंदिस ll

        अवकाळी, दुष्काळी l

       झेले संकटांचे फास *ll5ll*

तुरे बहरता शेतं l

धरी गोफनीचा गोट ll

माझ्या बापाच्या हातात l

साऱ्या दुनियेचं पोट *ll6ll*

      चार घास आनंदाचे l

      शेतकऱ्या उपकार ll

      धन्य धन्य बाबा तु रं l

      तुझं भाकरीचं झाडं *ll7ll*