अजूनही वेळ गेली नाही..!

समरसून जगण्याची कर एकदा घाई

अजूनही जगण्याची वेळ गेली नाही...

भरून घे श्वासात हा मुक्त रानवारा

रानभरी होण्याची अजुनी वेळ गेली नाही..

घे झेलून अंगावरती तुषार पर्जन्याचे

मयुरासम नाचण्याची अजुनी वेळ गेली नाही

ओतूनी भाव शब्दात फुलव तू गंधार आता

सप्तसुरात भिजण्याची अजुनी वेळ गेली नाही

पसरूनी पंख विस्तीर्ण उड उंच आकाशी

गगनभरारी घेण्याची अजुनी वेळ गेली नाही..