आर्जव

अरे माझ्या राज्यकर्त्यांनो 

का घडविता जाती-धर्मावरून दंगल , 

आपला देश तुम्हांस नसेल माहिती 

पण आहे कितीतरी पवित्र आणि मंगल !!

या देशाच्या रक्षणाकरिता 

एकत्र येऊन सीमेवर लढतो आम्ही , 

पण घरात बसून चुकीचे संदेश, आदेश देऊनी 

लढविता माणसां-माणसांना तुम्ही !!

तुम्हांस हे ठाऊक आहे का? 

आपल्या देशाची आहे संस्कृती महान , 

प्रत्येक जाती-धर्माची व्यक्ती 

हीच आहे आपल्या देशाची शान !!

विनवितो आज मी तुम्हांस 

हे आर्जव गोड मानून घ्या , 

देशातल्या साऱ्या जनतेला 

सुखी समाधानाने राहू द्या !!

नका करू हो जाती-धर्मावरून 

घाणेरडे अन् गलिच्छ राजकारण , 

नाहीतर ही जनताच एके दिवस 

असेल तुमच्या समूळ नाशाचे कारण !!