ರಾಧೆಯಿಲ್ಲದ ಶ್ಯಾಮ..
ರಾಧೆಯಿಲ್ಲದ ಶ್ಯಾಮ..
ರಾಧೆಯಿಲ್ಲದ ಶ್ಯಾಮನ ಜಗದೊಳಗೆ ಹುಡುಕುವೆಯೇಕೆ
ರಾಧೆಗಾಗಿಯೇ ಜನಿಸಿಹೆನೆಂಬ ಸತ್ಯವನು ಮರೆತೆಯೇಕೆ || ಎರಡು ಬಾರಿ||
ಪರಿಶುದ್ಧ ನಮ್ಮೀ ಪ್ರೇಮ ಬಲುಮಧುರ
ರಾಧಾಕೃಷ್ಣನ ಪ್ರೇಮಗಾಥೆ ಸದಾ ಅಮರ ||೧||
ಚಿಂತೆಯಾ ಚಿತೆಯಲಿ ನೀನೇಕೆ ಬಳಲುವೆ
ಬಿಡು ವಿರಹದಾ ನೋವ ನಿನ್ನೊಳಗೇ ಲೀನನಾಗಿರುವೆ
ರಾಧೆಯಿಲ್ಲದ ಮಾಧವನ ಇನ್ನೆಲ್ಲಿ ಕಾಣುವೆ
ನಿನ್ನೊಲವಿನಾ ಪಂಜರದಿ ನಾ ಬಂಧಿಯಾಗಿರುವೆ ||೨||
ನಿನ್ನ ಬಳಿ ನಾನಿಲ್ಲವೆಂದು ಮುನಿಸು ತೋರುವುದೇಕೆ
ನಿನ್ನೀ ಹೃದಯ ಚಿತ್ತ ಚೋರನ ದೂರುವುದೇಕೆ
ವಿರಹಾಗ್ನಿಯಲಿ ಬೆಂದು ಕಣ್ಣೀರು ಸುರಿಸುವುದೇಕೆ
ನಿನ್ನೊಳಗಿಹ ಕೃಷ್ಣನ ಕಾಣದೆ ಮರುಗುವುದೇಕೆ ||೩||
ಮುರಳಿಯು ನಾನು, ಮುರಳಿಯ ಗಾನವೇ ನೀನು
ನಿನ್ನುಸಿರ ಉಸಿರಾಗಿಹ ರಾಧಾಶ್ಯಾಮನು ನಾನು
ನಿನ್ನೊಳಗೇ ನಾನಿರುವಾಗ ವಿರಹ ಕಾಡುವುದೇನು
ಬಿಡು ಭ್ರಮೆಯ
ರಾಧೆ ಬಳಿಯಿರುವೆ ನಾನು ||೪||