ಬಹುಪುಟದ ಹೊತ್ತಿಗೆ

ಓ ನನ್ನ ಪ್ರಿಯತಮೆ,

ನನ್ನೊಲವನು ಕಣ್ಣ ಲೇಖನಿ ಮಾಡಿ,

ನಿನ್ನೊಲವಿನ ಕಣ್ಣ ಹಾಳೆಯ ಮೇಲೆ

ಬರೆಬರೆದು ಹಾಕಿದ ಪ್ರೇಮಪತ್ರಕೆ ಲೆಕ್ಕವುಂಟೆ?

ಹಾಗೆಯೇ ಓ ನನ್ನ ಒಲವೇ

ನೀ ಬರೆದ ಪ್ರೇಮಪತ್ರವೂ ಕಣ್ಣಿನಲೇ

ಅದು ನೀ ಬರೆದೆ ನನ ಕಣ್ಣ ಹಾಳೆಯ ಮೇಲೆ

ಅದರಲೇ ಕೊರೆದ ಚಿತ್ರಗಲುಂಟು.

ಲೆಕ್ಕವಿಲ್ಲದ ಆ ಪ್ರೇಮಪತ್ರಗಳ

ಆಕ್ಕರೆಯ ಅಕ್ಷರಮಾಲೆ, ಚಿತ್ರಗಳ ಸರಮಾಲೆ

ಎಲ್ಲವೂ ಅಚ್ಚಾಗಿದೆ ಪ್ರಿಯೆ

ಈ ನನ್ನ ಹೃದಯದಂಗಳದಲಿ.

ನಿನ ಹೃದಯದಲೂ ಇರಬೇಕು ಹಾಗೆಯೇ

ಅಚ್ಚಾಗಿಹ ಮುಚ್ಚಟೆಯ ಅಚ್ಚಚ್ಚಗಳು

ಬಿಚ್ಚಿ ಇಡಲಾದೀತೆ ಆ ನನ್ನ ನಿನ್ನ

ಹೃದಯದೊಳಗಿನ ಒಲವ ಪತ್ರಗಳ.

ಇವರೇಕೆ ಕೇಳಿಹರು ಪ್ರೇಮಪತ್ರವ ಬೆಸಗಲು

ಅದೆಲ್ಲ ನಮ್ಮೊಳಗಿನ ಸವಿಮಾತು ಕಿವಿಮಾತು

ಹೃದಯ ಹೃದಯದೊಳು ಬರೆದ ಪ್ರೇಮಪತ್ರ

ಮನಮನದೊಳಗೆ ಚಿತ್ರಸಿದ ರಂಗವಲ್ಲಿ.

ಅದು ನನಗಷ್ಟೇ ನಿನಗಷ್ಟೇ ಗೊತ್ತಿರುವ ಮಾತು

ನಿಮಗೆಲ್ಲ ತಿಳಿದಿರಲಿ ಈ ಪ್ರೇಮಪತ್ರಗಳೆಲ್ಲ

ನಮ್ಮಿಬ್ಬರದೇ ನಮ್ಮಿಬ್ಬರಿಗೇ ಎಂದು

ನಮ್ಮೊಳಗೇ ತೆರೆದಿಟ್ಟ ಬಹುಪುಟದ ಹೊತ್ತಿಗೆ.