ಹಸಿರೇ ನಮ್ಮುಸಿರು
ಹಸಿರೇ ನಮ್ಮುಸಿರು
ಹಸಿರೆ ನಿನ್ನುಸಿರು ಮನು ಕಂದ,
ಹಸಿರಾಗಿ ಮೆರೆಸೋ
ಈ ನಿನ್ನ ಧರೆ ತಾಯ,
ದೊರೆ ಹಂಗ ನಿನ್ನ ಸಲುಹೇನ,
ದೊರೆ ಹಂಗ ನಿನ್ನ ಸಲುಹೇನು
ಮನು ಕಂದ
ಈ ಜಗಕೆ ದೊರೆಯ ಮಾಡೇನು.
ಹಸಿರೆ ಈ ಜಗದ ಉಸಿರದು ಕಾಣ
ಹಸಿರಿಲ್ಲವೆಂದರೆ
ಧರೆ ಹತ್ತಿ ಉರಿದೀತೋ
ಇರಲೆಲ್ಲಿ ಹುಡುಕುವೆ ತಾವನ್ನು
ಇರಲೆಲ್ಲಿ ಹುಡುಕುವೆ ತಾವನ್ನು
ಮನು ಕಂದ
ಈಗಲೇ ಜತನಿಸು ಈ ನಿನ್ನ ಭೂತಾಯ
ನಿನ್ನುಸಿರು ನಾನಾಗೇ
ಹಸಿರಾಗಿಸು ನನ್ನನ್ನು.
ಹಸಿರಾದ ಭೂದೇವಿ
ಸುರಿಸ್ಯಾಳು ಖುಷಿ ಮಳೆಯ
ಬೆಳೆದುಂಡು ಬದುಕು ಜಗದಲ್ಲಿ
ಬೆಳೆದುಂಡು ಬದುಕು ಜಗದಲ್ಲಿ
ಮನು ಕಂದ
ಹಸಿರಿದ್ದರೆ ಉಸಿರುಂಟು
ಹಸಿವ ನೀಗಲುಂಟು.
ಕುಡಿಯಲು ನೀರುಂಟು.