ನಿಮ್ಮಂತೆ ನಾನಾಗಬೇಕು

ನಿಮ್ಮಂತೆ ನಾನಾಗಬೇಕು ತಿಳಿಸುವಿರಾ ಮೋಡಗಳೆ 

ಬಾಯಾರಿಹ ಜೀವಸಂಕುಲಕೆ ನಾಕು ಹನಿಯನೀಯಬೇಕು

ಕಾಡುಮೇಡುಗಳ ಸುತ್ತಿ ಅನ್ನದಾತನಾ ಹೊಲಕೆ

ನೀರೆರೆವ ನದಿಗಳೇ ತಿಳಿಸಿ ನಿಮ್ಮಂತೆ ನಾನಾಗಬೇಕು ||೧||

ನಿಮ್ಮಂತೆ ನಾನಾಗಬೇಕು ತಿಳಿಸುವಿರಾ ಹಕ್ಕಿಗಳೆ

ಚಿಲಿಪಿಲಿ ಗಾನದಲಿ ರಸಿಕರಾ ಮನವ ತಣಿಸಬೇಕು

ಹಸಿದ ಕೂಸಿಗೆ ಹಾಲೆರೆದು ಒಡಲು ತುಂಬುವ ಗೋಮಾತೆಯರೆ ತಿಳಿಸಿ

ನಿಮ್ಮಂತೆ ನಾನಾಗಬೇಕು ||೨||

ನಿಮ್ಮಂತೆ ನಾನಾಗಬೇಕು ತಿಳಿಸುವಿರಾ ತರುಗಳೆ

ಜಗಕುಸಿರಾಗಿ ಬೇಗೆಯಲಿ ನೆರಳಾಗಬೇಕು 

ಜೀವಜ್ಯೋತಿಯನುಳಿಸುವ

ಪ್ರಾಣವಾಯುವೆ ತಿಳಿಸು ಸೃಷ್ಟಿಯಲೊಂದಾಗಿ ನಿನ್ನಂತೆ ನಾನಾಗಬೇಕು|| ೩ ||

ನಿಮ್ಮಂತೆ ನಾನಾಗಬೇಕು ತಿಳಿಸುವಿರಾ ಜೇನ್ನೊಣಗಳೇ ಬಸವಳಿದು

ಮಕರಂದವಾ ಹೀರಿ ಮುದದಿ

ಜಗಕೆ ಸವಿಯನೀಯಬೇಕು

ಗೋವಿಂದನ ಚರಣ ಸೇರುತ ಲಕುಮಿಯ ಮುಡಿಯೇರುವ ಹೂವುಗಳೇ ತಿಳಿಸಿ

ನಿಮ್ಮಂತೆ ಹರಿಪಾದ ಸೇರಬೇಕು ||೪||