ನೆನಪಿನಾ ನೌಕೆ

ಮಧುರ ಮಧುರ ಮಧುರ ಈ ನಿನ್ನ ಅಧರ

ನಯನ ನಯನ ನಯನ ನೋಟವದು ಮಧುರ 

ಸುಡುತಿರೆ ತಂಗಾಳಿ ಬಯಸಿಹೇ ನಿನ್ನ ಸನಿಹ

ಕೊಲ್ಲುತಿರೆ ಕಣ್ಣೋಟ

ಸಹಿಸಲಾರೆನೀ ವಿರಹ...||ಮಧುರಾ||

ಪಯಣಿಗ ನಾನಿನ್ನ ನೆನಪಿನಾ ನೌಕೆಯಲಿ

ಜೊತೆ ಜೊತೆಯಲಿ ಸಾಗುವ ಬಾಳ ಬಂಡಿಯಲಿ

ತೇಲುವ ಪ್ರೇಮ ಸಾಗರದಿ ತೆರೆಗಳಾ ನಡುವೆ

ಅಂಬಿಗನಂತೆ ನೀನಿಲ್ಲದಿರೆ ದಡ ಹೇಗೆ ನಾ ಸಾಗುವೆ ||ಮಧುರ||

ಕಾಡುತಿರೆ ನಿನ್ನೀ ಕಂಗಳಾ ನೋಟವದು ಹೂ ಬಾಣ,

ಸಹಿಸೆ ಅಧರಾಮೃತವುಣಿಸಿ ತಣಿಸೆನ್ನ ಈ ಕ್ಷಣ

ಬಾ ನಲ್ಲೆ ಬಳಿ ನೀನೆನ್ನ ವಿರಹಾಗ್ನಿ ದಮಿಸಿ 

ಕೈಬೀಸಿ ಕರೆದಿಹುದೆಮ್ಮ ಕಾನನ

ಹಸಿರು ಹಾಸಿ  

 ||ಮಧುರ||

ತಿಳಿ‌ ಮುಗಿಲ ಮೇಲೇರಿ ಹಾರುವ ಹಕ್ಕಿಯಂತೆ

ಎಂದೆಂದೂ ನಗುತಿರು ನೀ ಬಾನ ಚಂದಿರನಂತೆ

ಸಿಹಿ ಮಾತಿನ ಮುತ್ತಿನಲಿ ನಲಿಯೋಣ ನಾವಿಂದು

ಪ್ರೇಮಸಾಗರದೀಜಾಡಿ ರಚಿಸುವಾ ರಸ ಕಾವ್ಯವಿಂದು ||ಮಧುರ||