ಜಾತಿ ವಿಷದ ಬೀಜ

ಜಾತಿ ವಿಷ ಬೀಜದ ಮರ

ಆಳ ಅಗಲದಿ ಬೆಳೆದಿದೆ I

ಬೇಕಿಲ್ಲ ಅದಕೆ ಗಾಳಿ ಮಳೆ

ಜ್ಞಾನ ಸೂರ್ಯದ ಬೆಳಕು II

ಬುದ್ಧಿಗೆಟ್ಟ ಗೊಬ್ಬರ ಸಾಕು

ಹುಲುಸಾಗೆ ಬೆಳೆಯುತ್ತದೆ I

ಉದ್ದುದ್ದ ಹರಡಲು ಬೇಕು

ಹೊಲಸು ನಾಲಗೆಗಳವಕೆ II

ಎಲ್ಲಿ ಬೆಳೆಯಲಾರದೇಳಿ?

ಶಾಲೆ ಕಾಲೇಜನ್ನೂ ಬಿಟ್ಟಿಲ್ಲ I

ವಿಶ್ವವಿದ್ಯಾಲಯವನ್ನೂ..

ವಿಶಿಷ್ಟ ಪದ‌ನಿಮಿತ್ತರನ್ನೂ II

ಬುದ್ದಿಗೆ ಒಮ್ಮೆ ಸೇರಿದರೆ

ರಕುತದಲ್ಲೇ ಹರಿವುದಿದು I

ಹತ್ತಿರ ಬಿಡಗೊಡದಂತೆ

ದೂರವೇ ಉಳಿಯುವುದು II

ಸಾಹಿತ್ಯದಲ್ಲೂ ವಿಷಬೀಜ

ಲೇಖಕ ಸಂಪಾದಕರಲ್ಲೂ I

ಪ್ರತೀ ಕೊಂಬೆಗಳವರೆಗೆ

ಪ್ರತೀ ಹೂವುಗಳವರೆಗೆ II

ದ್ವೇಷದ ಬೆಂಕಿಯುಗುಳೋ

ಮನುಜನಲ್ಲಿ ಚಿಗುರೊಡೆದು I

ಸಮಾಜದಿ ಹಬ್ಬುವ ಬಳ್ಳಿ

ಹರಡುವ ಜಾತಿ ವಿಷ ಬಿಜ II