ಹನಿಯಬೇರು

ತೆರೆದ ತುಟಿಯ ದಳಗಳು |

ಅರಳಿ-ಹೊರಳಿಸಿತು ಮನವ || 

ಮುಗ್ಧ-ಸ್ನಿಗ್ಧ ಬಾಲಿಕೆಯ | 

ಸುತ್ತತೊಡಗಿತು ಜೀವ ಬಳ್ಳಿ || 

ನಾಚೀನೀರೇ ನೀರು ನೀನು.. 

ನಿನ್ನೊಡಲ ತುಂಬಾ ಲಜ್ಜೆ || 

ಬಳುಕಿ ಹರಿವ ಒಡಲ ತುಂಬಾ 

ಮುತ್ತುಮದ್ರೆಗಳದೆ ಹೆಜ್ಜೆ || 

ಶಾಖ-ಸುಖದ ಮುತ್ತ ಸ್ಪರ್ಶ 

ಹೂವಿನೆದೆಗೆ ಮುತ್ತಹನಿ || 

ನಿನ್ನ ಎದೆಯ ಹರವು ತುಂಬಾ 

ಸೃಷ್ಠಿಶೀಲ ಜೇನಹನಿ || 

ಭೂಮಿ ಎದೆಯ ಗರ್ಭದಲ್ಲಿ 

ಗಗನ ಚುಕ್ಕಿ ಹನಿಯ ಬೇರು || 

ಉಕ್ಕಿದೆದೆಯ ಹಾಲ ಸತ್ವ 

ಸೃಷ್ಠಿ ಲಯದ ಗಾನ ತೇರು || 

ಪಯಣದಲಿ ನಾನು-ನೀನು 

ನೀನು ಬೇರು - ನಾನು ನೀರು || 

ನಿನ್ನೊಲವ ನಿರೀಕ್ಷೆಯೊಳು 

ಕಾರ‍್ಯ ಕಾರಣ ನಾನು-ನೀನು || 

ನಿನ್ನ ನಗುವ ಜಗದ ಒಳಗೆ 

ಬೆಳ್ಳಕ್ಕಿ ಪಂಕ್ತಿಗಳು || 

ಫಲದ ಸುಖದ ಕಂಪಿನೊಳಗೆ 

ಹೊಂಗನಸಿನ ಜನ್ಮಗಳು || 

ನನ್ನ ಮುತ್ತು - ನಿನ್ನ ಪ್ರಾಣ 

ಜಗತಿಗೊಂದು ಹೊಸತು ಪಯಣ || 

ನುಡಿಸಿ-ಬಡಿಸಿ ರಾಗದೊಳಗೆ 

ಜಗದ ನಿಯಮ ಇದುವೇ ಕಾಣ ||