भोजपुरी चुनावी पूर्वी लोक गीत
भोजपुरी चुनावी पूर्वी लोक गीत
सबके त दिहला सईया भोटवा हर बार,
हमरे सईया जी
केकरा के देबा भोटवा अबकी बार,
हमरे सइया जी।
सबकर बा दावा हमही देशवा चलाइब,
हमरे सइया जी
के हो चलाई निमन देशवा हमार
हमरे सइया जी।
दुनिया कहाला देशवा सोनवा चिरइया,
हमरे सइया जी
केवन नेतवा बहइहे दहि दुधवा के धार,
हमरे सइया जी।
बेरी -बेरी घुसी आवे बैरी दुशमनवा,
हमरे सइया जी।
केहो भगइहे दुशमनवा सिमवा के पार,
हमरे सइया जी।
भूखीया गरिबिया से हऊवे देशवा बेहाल,
हमरे सइया जी
के हो मिटइहे गरिबीया औ बेरोजगार,
हमरे सइया जी।
जेवन निभइहे नेता देशवा के वादा,
हमरे सइया जी
दबाई के बटनिया बनईबों उबके सरकार,
हमरे सइया जी।