યાદ તારી સળવળી

પાન લીલુંછમ હતું, ને, યાદ તારી સળવળી,

ધૈર્ય અંજુમન હતું, ને, યાદ તારી સળવળી,

બૂંદ જ્યાં વરસાદનું આવ્યું, ગયું મન ભીંજવી,

પ્રેમનું પડઘમ હતું, ને, યાદ તારી સળવળી,

સ્વપ્ન કારોબાર કરતો રહ્યો મિલન તણો,

ભાવનું સપ્તમ હતું, ને, યાદ તારી સળવળી,

આંખ જ્યાં ઉઘડી, વિયોગી ભીતરે ભાંગી પડી,

દર્દનું માતમ હતું, ને, યાદ તારી સળવળી,

સાદ દઈ બોલાવતી, આવી સખીઓ ખોળતી,

લાજનું નિયમન હતું, ને, યાદ તારી સળવળી,

હાંક આજે, હલબલાવી ગઈ સજડ એકાંતને,

શાંત ને મોઘમ હતું, ને, યાદ તારી સળવળી,

ને હવા સંદેશ ફેલાવી રહી, મિલન તણો,

જાતનું જોખમ હતું, ને, યાદ તારી સળવળી.