વરસાદ આવે

કદીક

દુર્વાસાના શાપની જેમ

કદીક

ઘરડા-માંદા બળદની જેમ

આવે વરસાદ.

કબરમાં સૂતેલ

મડદામાં પણ

જગાવવી હોય તરસ,

એ રીતે

આવે કદીક.

બાષ્પીભવનમાં

બાકી રહેલી

ખારાશને લીધે

સમુદ્ર જ્યારે

ઉલ્ટી કરવા લાગે,

ત્યારે માંડ આવે.

વૃક્ષો

નગ્ન બની

શરમ છોડે ત્યારે

આ બેશરમી આવે.

પોતાને

કર્ણ માનતો એ

જીવ મરે ત્યારે

દાન દેવા આવે.

વાદળમાં સંતાઈ

રમે સંતાકૂકડી,

પકડનાર થાકે

બેભાન બને ત્યારે

આવે લુચ્ચો વરસાદ.

ઘનઘોર

બન્યું હોય આભ,

તોયે ટીપે ટીપે આવે,

જાણે

મગર આંસુ પાડે.