વન-વગડામાં
વન-વગડામાં
હાલને ભેરુ, વન-વગડામાં, રમતા-ભમતા જોશું
તડકો-છાયો, ભૂલી જઈને, નવલું-રૂડું જોશું,
ડુંગર જોશું, ખીણો જોશું, તળાવ-કોતર જોશું
ખળખળ વહેતા, ઝરણાં જોશું, નદી-નાળાં જોશું,
આવળ જોશું, બાવળ જોશું, આકડા-ખાખરા જોશું
ઝાડી જોશું, વાડી જોશું, નાનામોટા જીવજંતુને જોશું,
હરણાં જોશું, સસલાં જોશું, સાપને નોળિયા જોશું
હાથી જોશું, શિયાળ જોશું, વાંદરભાઈને જોશું,
કોયલ જોશું, સારસ જોશું, હોલા-તેતર જોશું
મોર-બપૈયા, સમડી-ચીબરી, બાજ-ગરુડને જોશું,
વાડને વેલે, વાલોળ પાપડી, ડોડા-ડોડી વીણશું
આંબલી-પીપળી, દોડા-દોડી, કુદમકુદા કરશું,
ભૂખ લાગે તો, ખાટા-મીઠા, બોર વીણીને ખાશું
જાંબુ-રાયણ, કેરી-ગુંદા, લીંબુ-આંબલી ખાશું,
હરશું-ફરશું, નાચશું-કૂદશું, ડુંગર-કોતર ખુંદશું
'વાલમ' સાથે, મોજ કરીને, ગીતો રૂડાં ગાશું.