વિરહની રાત
વિરહની રાત
વિરહની રાત છે, મન છે ઉદાસથી આગળ
આ આદ્ર આંખો જુએ છે શું ભાસથી આગળ
ખફા થઈને એ પડખેથી થઈ ગયા ઊભા
ગ્રહી શક્યો ન હાથ પણ પ્રયાસથી આગળ
જીવનના માર્ગ પર ચાલ્યા કર્યો હું દૂર સુધી
તલાશમાં હું કશાની પ્રવાસથી આગળ
આ મૃગજળોથી સહેજ દૂર હશે જળ જેવું
હું એમ માનીને ચાલ્યો'તો પ્યાસથી આગળ
હું શોધતો જ સ્વયંને રહ્યો તિમિરમાં અને
લઈ ગઈ મને છાયા ઉજાસથી આગળ
આ લખવું કહેવું બધું છે કપોળકલ્પિત ને
કશુંક સત્ય છે વાણી વિલાસથી આગળ
હનીફ શબ્દના વિન્યાસનો નથી આ કસબ
ગઝલમાં હોય છે એક દર્દ પ્રાસથી આગળ